„ბუერა“-გზა ექსპერიმენტიდან წარმატებულ ბიზნესამდე

0
2004

ჩვენი ქვეყანა ხელოვანი ადამიანების ნაკლებობას რომ არ განიცდის, ამაში თითოეული ჩვენგანი ყოველდღიურად ვრწმუნდებით. ხელოვნება-ეს ხომ ტკბობაა იმით რასაც თავად ქმნი, საკუთრი ხელით აკეთებ და ამავე დროს სხვას აძლევ საშუალებას დატკბეს შენი შექმნილი ხელოვნების ნიმუშით. ზოგიერთი ადამიანი ხელოვნებას ბავშვობიდან ირჩევს, ზოგიერთი სკოლის ასაკში ან მისი დამთვრების შემდეგ. ზოგიერთი კი შემთხვევითი ექსპერიმენტის შემდეგ აღმოაჩენს, რომ მას რაღაც მნიშვნელოვანის შქმნა შეუძლია და რაც ყველაზე მთავარია, მისი შექმნის პროცესი საოცრად მოსწონს. ასე იწყება თეონა ბაკურაძისა და მაია თავართქილაძის შემოქმედების ისტორია. მათ შექმნეს ხელნაკეთი აქსესუარების ბრენდი „ბუერა“, რომელიც 2012 წლიდან ქართველ მომხმარებელს ორიგინალური ნივთებით და საჩუქრებით ახარებს. „ბუერას“ ერთ-ერთი დამფუძნებელი თეონა ბაკურაძე ესაუბრა „პრეს თაიმერს“ „ბუერას“ შექმნისა და მისი დღევანდელი გეგმების შესახებ.

მოგვიყევით თქვენზე, როდის გაგიჩნდათ იდეა შეგექმნათ ხელთნაკეთი ნივთები?

აქსესუარების და მინიატურული სკულპტურების შექმნის იდეა მომივიდა პატარა სტოპ-მოუშენ ანიმაციის გაკეთების შემდეგ. ზაფხულში დასასვენებლად არ წავედი,დავრჩი თბილისში და მთელი ბინა სახელოსნოდ გადავაქციე. ყველგან ქაღალდები, ნაჭრები,მავთულები, პლასტილინი, სხვადასხვა რეკვიზიტები ეყარა. ყველა მაგიდა დაკავებული იყო – პატარა სცენები მქონდა გაშლილი. სტოპ-კადრ ანიმაციას დიდი შრომა სჭირდება,ამას პროცესში მივხვდი,არაფერი გამეგებოდა ამ საქმისა,პრინციპს მივხვდი და დავიწყე უვიცის თავდაჯერებით. ბოლოსკენ უკვე ისე დავიღალე, სცენარს გადავუხვიე და მივაფუჩეჩე, ერთი სულ მქონდა,გამეგო რა გამოვიდა. რაც გამოვიდა,შეგიძლიათ იხილოთ youtube, vimeo- ზე: My gold with me- “ჩემი ოქრო ჩემთანა”; ასე ექსპერიმენტიდან დაიწყო ყველაფერი.

როდის შეიქმნა თავად ბრენდი?

სანამ მეორედ გავბედავდი ანიმაციის გაკეთებას, ძერწვას ჩავუჯექი. პოლიმერული თიხა მოვსინჯე და ძალიან მომეწონა. რამდენიმე ნივთის გაკეთების შემდეგ, ჩემი ბავშვობის მეგობარს,მაია თავართქილაძეს შევუჩნდი, შემომიერთდი-მეთქი და დაახლოებით 1 თვეში ფეისბუკ გვერდი გავაკეთეთ – „Buera handmade accessories.“

საიდან მოდის თავად ბრენდის „ბუერას“ სახელწოდება?

2012 წლიდან დღემდე ექსპერიმენტებით და პატარ-პატარა აღმოჩენებით მოვდივართ. სახელი “ბუერა” სულხან-საბა ორბელიანის ქართული სიტყვის ლექსიკონში აღმოვარჩიე, მცენარეა, რაიმე განსაკუთრებული ნიშნის გამო არა, უფრო სახელის ჟღერადობა მომეწონა.

ძირითადად რა ტიპის ნივთებს ამზადებთ?

ვამზადებთ აქსესუარებს – ყელსაბამებს, გულსაბნევებს, ბეჭდებს, სამაჯურებს, თმისსამაგრებს, საყურეებს და ასევე,მცირე ზომის სკულპტურებს. სხვათა შორის, ახლა ძალიან საინტერესო ვიზუალზე ვმუშოაბთ – ე.წ. snowglobe-ს სტილში იქნება მინიატურული სცენები. გამოვიყენებთ ხეს, პოლიმერულ თიხას, resin-ს (ორკომპონენტიანი ნივთიერებაა, ფისის მსგავსი, რამდენიმე დღეში შრება, გამჭვირვალეა და იდეალურია,მაგალითად გამომშრალი ყვავილებით ჰერბარიუმ-ყელსაბამების გასაკეთებლად,ჩვენ ასეთებს დიდი სიამოვნებით ვამზადებთ – ჩვენივე შეგროვილ-დაპრესილი ყვავილებით).

რა არის ამ საქმეში განსაკუთრებული,რის გამოც, მისი კეთება მოგწონთ?

„ბუერაში“ ფუსფუსი იმიტომ მომწონს,რომ ჩემთვის იდეალური სამსახურის სცენარით შევქმენი,ჩემზე მოვირგე. ფრილანსერობის ხიბლი ვისაც ესმის,მიმიხვდება. არ გყავს უფროსი, არ გყავს ხელქვეითი. შენი ფანტაზიით და შენი რისკით მოქმედებ. რა თქმა უნდა,არის ბნელი მხარეებიც. მაგალითად, ის, რომ რაღაც მომენტში,შეიძლება პირიქით,იმაზე მეტი იმუშავო,ვიდრე ჩვეულებრივ,სტანდარტული სამსახურის შემთხვევაში მოგიწევდა.ან, რაღაცები სწორად ვერ გათვალო – ბევრჯერ გამიკეთებია ნივთი დიდი სიხარულით და აღფრთოვანებით. მგონია, რომ ძალიან მაგარი რაღაც გამოდის და ოვაციებით შეეგებებიან,მაგრამ – სრული დუმილი.. და პირიქით,ხანდახან უბრალოდ, თამაშით და სასხვათაშორისოდ გაკეთებული დიზაინი დიდი ხნის მანძილზე ინარჩუნებს წამყვან პოზიციებს გაყიდვებში. ჩემთვის ეს ორივე შემთხვევა სასიამოვნოა – ეს არის აზარტი. მე არ დავდივარ კაზინოებში,ჯოკერის თამაშიც კი არ ვიცი,მაგრამ ამ ჩემს თამაშში ვარ აზარტული და ხან წაგებული, ხან მოგებული.

 რამდენი ადამიანია დასაქმებული თქვენს ბიზნესში?

ჩვენი რიცხვი მალე გაიზრდება, რადგან გეგმები მაქვს – სტენდის გახსნა მინდა რომელიმე სავაჭრო ცენტრში. ვფიქრობ, დამატებითი ძალები დაგვჭირდება.

როგორია ფასები და სად შეიძლება „ბუერას“ შეძენა?

ფასები სუპერ-იდეალური გვაქვს. საშუალოდ – 20 ლარად ჩვენს გვერდზე შეგიძლიათ შეარჩიოთ ხელით გაკეთებული აქსესუარი და ასევე ხელით შეკერილი სასაჩუქრე ქისით მიიღოთ, შეფუთვაზე ფიქრიც არ მოგიწევთ.

რა გამოგარჩევთ სხვებისგან, რატომ უნდა შეიძინოს მომხმარებელმა თქვენი ნამუშევარი?

მომხმარებელს შეუძლია დაათვალიეროს ჩვენი გვერდი – www.buera.ge და თავად ნახავს, რაც გამოგვარჩევს სხვებისგან. 2012 წლიდან დღემდე უმრავი სიანტერესო რამ გვაქვს გაკეთებული, მაგრამ ეს ნამდვილად არაფერია იმასთან შედარებით,რასაც ვაპირებთ სხვათა შორის, ბევრმა ახალგაზრდამ ჩვენი გვერდის აღმოჩენის შემდეგ თავად დაიწყეს ნივთების დამზადება.  მოსაწყენ და უინტერესო სამსახურებში განაცრისფერების მაგივრად, მათ ახლა ჭრელი და ცოცხალი საქმე აქვთ, ნახევრად თამაშის სახის. ასე რომ, ჩვენ ძალიან გვიხარია, კარგად ვიცით,რას გრძნობენ ისინი.

საქართველოს გარდა, რომელიმე ქვეყანაში ხომ არ გაგაქვთ  ნამუშევრები?

გერმანიიდან მალე www.etsy.com– ზეც გაიყიდება ჩვენი ნამუშევრები. ეს სწორედ ის საიტია,სადაც ჩვენ ვიპოვეთ შთაგონება თავის დროზე დ ამიტომ, აქ ჩვენი მაღაზიის გახსნა  რაღაც წრის შეკვრას ჰგავს. ძალიან კარგი იქნებოდა, საქართველოდან სხვა ქვეყნებში მცირე ზომის ამანათების გაგზავნა ასე არაადეკვატურად ძვირი რომ არ ღირდეს. ყველას, ვინც საქართველოში ხელით ამზადებს ნივთებს, რომ შეეძლოს საზღვარგარეთ გაყიდვა, ძალიან ბევრი ადამიანი იმუშავებდა და ოჯახებსაც არჩენდა. ჯერჯერობით,არცერთ კომპანიას,საქართველოში მოქმედს, არ აქვს მისაღები ტარიფები. ამიტომ,ჩვენ ალტერნატიულ გზას მივმართეთ, მაგრამ ძალიან კარგი იქნებოდა,აქედანვე რომ შეგვძლებოდა გაგზავნა, მარტო ჩვენთვის კი არა,  ძალიან ბევრი ადამიანისთვის.

რაიმე სიახლეს ხომ არ სთავაზობთ მომხმარებელს ქალთა დღესთან დაკავშირებით?

ჩვენ ძალიან გვიყვარს ფასდაკლებების და სხვადასხვა საჩუქრების გაკეთება. ხანდახან, სრულიად უმიზეზოდ ვჩუქნით ხოლმე ნივთებს ჩვენს მომხმარებელს. უბრალოდ, კარგ ხასიათზე ვართ დ ამიტომ. როცა მიზეზი გვაქვს, მაშინ – მით უმეტეს. სწორედ ახლა,ჩვენს გვერდზე,შეგიძლიათ დაათვალიეროთ ფასდაკლებული ნივთების ფოტოები. მომავალში ვგეგმავთ გაფურჩქვნას.

 

ავტორი: მარიამ ლეკიაშვილი

კომენტარი

Please enter your comment!
Please enter your name here